+374 93 331-663
Մարդու իրավունքների եզդիական կենտրոնի հանդիպումների շարքը պետական կառույցների ներկայացուցիչների հետ շարունակվում է։ Այս անգամ կազմակերպության ներկայացուցիչներին ընդունեց ՀՀ արդարադատության նախարարի տեղակալ Քրիստինե Գրիգորյանը
Քննարկվեցին եզդիական համայնքի առջև ծառացած խնդիրները և դրանց լուծման օրենսդրական ուղիները։
Մարդու իրավունքների եզդիական կենտրոնի նախագահ Սաշիկ Սուլթանյանը կարևորեց ազգային փոքրամասնությունների մասին օրենքի ընդունումը, անցումային արդարադատության իրականացումը ազգային փոքրամասնությունների խնդիրների համատեքստում և եզդիական համայնքում տարածված վաղ ամուսությունների խնդրի լուծման օրենսդրական մեխանիզմերի մշակումը։
«Առաջին հերթին՝ մեզ համար շատ կարևոր է ազգային փոքրամասնություններին վերաբերող օրենքը, որն արդեն 3 տարի է քննարկվում է։ Երկրորդ հարցը, որը ևս կարևոր է, անցումային արդարադատությանն է վերաբերում։ Կան մի շարք իրավախախտումներ, որոնք ժամանակին կրել են համակարգային բնույթ, և մենք որպես կառույց՝ ակնկալիքներ ունենք՝ մեր ունեցած պատմությունները կարձանագրվեն որպես նախադեպեր՝ հետագայում նմանատիպ դեպքերից խուսափելու նպատակով։ Երրորդ կետը վաղ ամուսնությունների խնդրին է վերաբերում, որը ազգային փոքրամասնությունների, հատկապես եզդիական համայնքի համար շատ կարևոր ու զգայուն թեմա է»․-նշեց Սուլթանյանը։
Նախարարի տեղակալը, ողջունելով հանդիպման մասնակիցներին, նշեց, որ վերոնշյալ հարցերն օրակարգային են նախարարության համար։ «Ինչ-որ հարցեր ճյուղային օրենսդրություններով կարգավորված են։ Մենք ունենք մի քանի ընթացիկ օրենքներ, որոնք նույնպես վերաբերում են նշված հարցերին և շատ ուրախ կլինենք ձեր կողմից ստանալ առաջարկությունների փաթեթ, որը մեր աշխատանքն ավելի արդյունավետ ու թիրախային կդարձնի»։
Հանդիպման ավարտին նախարարի տեղակալը պատասխանեց կազմակերպության ծրագրերի մասնակից երիտասարդների հարցերին։
