+374 93 331-663
Անցած շաբաթ Իրաքում վերջին հրաժեշտը տվեցին եզդի հոգևոր առաջնորդ Բավե Շեխին։ Նրա աճյունը ամփոփվեց Բոզան գյուղում, որտեղ և ամփոփված են նրա նախնիները։ Հազարավոր աշխարհիկ եզդիներ էին եկել վերջին հրաժեշտը տալու իրենց հոգևոր առաջնորդին։ Ներկաների թվում էին Իրաքի իշխանությունների ներկայացուցիչներ, օտարերկրյա դիվանագետներ, հասարակական ու մշակութային գործիչներ:
COVID-19 համաճարակի հետ կապված ՝ եզդիական սփյուռքի շատ ներկայացուցիչներ ի վիճակի չէին գալ Իրաք՝ հրաժեշտ տալու Բավե Շեխին:
Եզդիական սփյուռքում անցկացվեցին հիշատակի երեկոներ։ Նման միջոցառումներ անցկացվեցին Թբիլիսիում, Եվրոպայի և ԱՊՀ մի շարք երկրների եզդիական համայնքներում։
Բավե Շեխի մահվան կապակցությամբ ցավակցական խոսքեր են գալիս ամբողջ աշխարհից։ Պետությունների, միջազգային կազմակերպությունների ղեկավարները և սովորական մարդիկ ցավակցում են նրա հարազատներին, սիրելիներին և ամբողջ եզդի ժողովրդին:
Առաջին ցավակցական ուղերձը հղեց Իրաքի վարչապետ Մուստաֆա ալ Քազիմը։ Ցավակցական ուղերձներ են հղել նաև Իրաքի նախագահը և Իրաքյան Քուրդիստանի բարձր ղեկավարությունը։
Նոբելյան մրցանակի դափնեկիր, իրավապաշտպան Նադիա Մուրադը ևս ցավակցական ուղերձ է հղել․
«Այսօր եզդիական համայնքը ի դեմս Բավե Շեխի կորցրեց իր լույսի շողը, իր հոգևոր առաջնորդին, ով մեր արժեքների, բարության, իմաստության և հանդուրժողականության մարմնացումն էր»,- գրել է Նադիա Մուրադը։
Ցավակցական խոսքեր են հնչել նաև ՄԱԿ-ի և այլ միջազգային կառույցների ներկայացուցիչների կողմից։
Ախտյարե Մարգե Բավե Շեխ Խատո Խաջի Իսմաիլը ծնվել է 1932 թ․ Ֆախրադին շեխերի ընտանիքում։ 1996-ին, Բավե Շեխ Իլյասի մահից հետո ձեռնադրվեց «Բավե Շեխ»: Նա ղեկավարեց հոգևոր համայնքը եզդիների պատմության շատ դժվար և շրջադարձային ժամանակահատվածում։ Նորին Սրբությունն ակտիվորեն աջակցում էր ԻՊ ահաբեկիչների կողմից բռնության զոհ դարձած եզդի կանանց: Նրա օրհնությամբ տաճարներ բացվեցին Հայաստանում և Վրաստանում:
