+374 93 331-663
Այս հաղորդմանը ներկայացրել ենք Իրաքից Հայաստան տեղափոխված եզդի փախստականներին։ Հայաստանում Իրաքից եզդիների հոսք սկսվեց դեռևս 2014 թվականից, երբ Իրաքի հյուսիսում՝ եզդիների պատմական հայրենիքը համարվող Շանգալի երկրամասում եզդի ժողովրուրդը ցեղասպանվեց, բռնի տեղահանվեց իր պատմական հողերից ԴԱԻՇ ահաբեկիչների ձեռքով։
2014-ին եզդիների հանդեպ կատարվածը որպես ցեղասպանություն ճանաչվեց աշխարհի շատ երկրների կողմից, այդ թվում՝ Հայաստանի Հանրապետության։
Սակայն 2014-ից ի վեր Շանգալում իրավիճակը այդպես էլ չի կայունանում։ Եզդիներին իրենց կրոնի և եզդի ինքնության պատճառով սպառնացող վտանգները ոչ միայն չեն վերանում, այլ մինչ օրս շարունակվում են․ շատ տեղահանվածներ անվտանգային պայմանների բացակայության պատճառով չեն վերադառնում Շանգալ, շարունակում են մ նալ փախստականների ճամբարներում, զանգվածաբար լքում են Իրաքը, հազարավորները դեռևս հանդիսանում են անհետ կորածներ։ Հենց այպիսի պայմաններում 2014-ից սկսած եզդիների համեմատաբար մեծ ներհոսք սկսվեց նաև դեպի Հայաստանի Հանրապետություն, շատերը դեռ այն ժամանակ եկան, չկարողանալով ինտեգրվել Հայաստանում, հեռացան։
Ըստ Միգրացիոն ծառայության մեզ փոխանցած տվյալների՝ 2023 թվականի ընթացքում ՀՀ-ում ապաստան են հայցել Իրաքի՝ ազգությամբ եզդի 23 քաղաքացիներ, որոնցից 17-ը ՀՀ-ում ճանաչվել են փախստական և ապաստան։
Աշխատանքի և Սոցիալական հարցերի նախարարությունից մեր մյուս հարցմանը պատասխանեցին, որ Ըստ ՀՀ կառավարության 2022 թվականի որոշման՝ Հայաստանի Հանրապետությունը պարտավորվում է փոխհատուցում տրամադրել մեր երկրում փախստական ճանաչված անձանց ժամանակավոր կացարանով ապահովման խնդրի լուծման նպատակով։
