Եզդիները նոր հոգևոր առաջնորդ են ընտրել -

Շաբաթ օրը Լալիշի հոգևոր խորհրդի որոշմամբ եզդիների հոգևոր առաջնորդ է ընտրվել Շեխ Ալի Ալյասը։ Եզդիական հոգևոր հիերարխիայում նշանակությամբ երկրորդ հոգևոր առաջնորդի՝ Բավե Շեխի տեղը թափուր էր մնացել հոկտեմբերի 1-ից, Շեխ Խատո Խաջի Իսմաիլի մահվանից հետո։

Այսօր Լալիշ սրբավայրում եզդիների գերագույն հոգևոր առաջնորդի՝ Միր Հազիմ Թահսին Բեգի և եզդիների բարձրաստիճան հոգևորականների մասնակցությամբ Շեխ Ալի Ալյասը պաշտոնապես ներկայացվեց որպես եզդիների նոր Բավե Շեխ։

Բավե Շեխի համար նախատեսված հանդերձանքը կրելով և եզդիական հոգևորական ծիսակարգով սահմանված արարողությամբ Շեխ Ալի Ալյասը երդում տվեց և ստանձնեց իր նոր առաքելությունը։

Եզդիների նոր Բավե Շեխը՝ Շեխ Ալի Ալյասը ծնվել է 1979թ․ Շեխանում։ Նրա հայրը 1978-1995թթ․ եղել է եզդիների հոգևոր առաջնորդը՝ Բավե Շեխ։